Minista, un poème en créole de Louis-Philippe Dalembert

Publié par siel sur 12 Juin 2014, 09:50am

Catégories : #culture

minista

nèg la antre nan lakou lakay ou
li refize sòti
solèy leve loray gwonde
li refize sòti
ou di msye lè a rive
pa kite jou bare w
olye l fè wout baryè
li monte sou galri

nèg la kanpe sou galri lakay ou
li refize sòti
lapli tonbe solèy kouche
li refize sòti
ou di l monchè ou pa tande
zandolit ak krikèt ap chante
olye l pran wout lari
li fè chimen salon
li rale yon dodin
epi l tanmen bwè bweson

nèg la chita nan salon lakay ou
li refize sòti
lalin pwente zetwal limen
li refize sòti
ou di msye tande non djab
ou pa wè jou a bout
souke pousyè bounda w
olye l pran chimen pòt
li kage chèz (li) an dodomeya
kwaze de pye l sou tab
epi l mande manje

ou pa menm fin drese chodyè
li bap li kanpe
li pa ba w tan separe
pran pa w ban m pa m
sa a pou ou sa a pou mwen
li di l pa vin isit pou l betize
li vin isit pou l dekoupe
li chita l dekoupe kòpyèz
epi l ba w yon zo poul
pou gaz pa anpare w

nèg la antre nan bout kay ou
li refize sòti
ou di tande non monchè
alèsila menm koukou ap dòmi
li refize sòti
olye l pran chimen pòt
li kannale lachanm
layite sou kabann
layite sou madanm
pran granmoun kou timoun
tifi kou tigason

nèg la antre lakay ou
li refize sòti
ou di msye w koumanse bouke
li refize sòti
li di w zoboukechen
pran yon atèmiyò
w a lage kadav kò w
w a fè yon kabicha
epi sispann babye
pou dòmi l pa bat bwa

nèg la antre anndan lakay ou
li refize sòti
ou di men sa se twòp atò
li refize sòti
alafen w blije mande
sa l pot pou vann
li di l pot kolera
li pot kokomak
li pot imilyasyon ak pèpè depaman
li di se ou ki te rele l

li di anvan chen manje zo
li mezire machwè l
si ou pa t nan hing hang
pa t nan chen manje chen
alè konsa kap ou t ap bay chika
li di makak pa jwe ak tig
si w pa t sakaje pay nich ou
kap ou ta bay solèy lodyans
grangou se mizè
vant plen se traka

nèg la monte sou bitasyon w
li refize sòti
zonbi yo t ap dòmi
li refize sòti
djòl zonbi yo mare
li ba yo baboukèt
ou di msye si l pa sòti
gade non
w a va kraze l
w a va brize l

msye gade w li pete kwa kwa kwa
ak ki sa w vle kraze
ak ki sa w vle brize a
sa fè lontan grenn ou nan plán
poudayè si w te gen grenn
ou pa ta janm voye chache l
li di w monchè
vekse nan fouk ou

blan an monte sou bitasyon w
li refize pati
solèy leve solèy kouche
li refize pati
lalin ale lalin vini
lalin ale l pa janm tounen
epi yon jou konsa
tout zetwal disparèt
balèn nan men tout moun
ap chache koulè solèy
ap chache lodè solèy

epi yon jou konsa
ou gade w wè
ou pa mèt kay ankò

Louis-Philippe Dalembert
Pòtoprens, 15/12/2013

Haïti-Minustah : L'histoire d'un visiteur indésirable

P-au-P, 11 juin 2014 [AlterPresse] --- Alors qu'une campagne continentale pour le départ de la Mission des Nations Unies pour la stabilisation en Haïti (Minustah) progresse, l'écrivain haïtien ...

http://www.alterpresse.org/spip.php?article16573